http://moeys.net

زيــن الأردن… طفح الكيل

August 4th, 2011

اليوم قررت أكتب عن زيـن الأردن وبالعربي لإنو يمكن ما فهمو اللي كتبنه بالانجليزي قبل. أنا من محبي التكنولوجيا واللي بيصرفو ٩٠٪ من معاشهم عليها سواء كان موبايل جديد، انترنت سريع… إلى آخره. نزلت زين من فترة عروض على اشتراكات الانترنت الفائق السرعة وهي انو اذا الواحد بيشترك معهم لمدة سنه وبيلتزم بسداد الفواتير في أوقاتها المحددة بيحصل على سقف تنزيل مضاعف مدى الحياة. حلو لهون الموضوع

اللي صار اني اشتركت والسرعة ماشي حالها، طبعا ما بتوصل الـ ٢١ ميجا لو نزل الجني الأزرق. أنا جربتها وين ما بدكم ب عمّان، بالسلط، طريق المطار، البحر الميت… وين ما بدكم ما بتوصل السرعه أكتر من ١٠ ميجا. طبعاً بتحكي مع زين بيقولولك ماهو احنا قلنا تصل إلى…. ما علينا، هادا مش اللي عم بشكي منه

اللي عم بشكي منه، أنا انتقلت الى جبل الليوبدة مؤخراً. طبعاً سألت موظف زين في تغطيه هناك، أكدلي انها شغالة مية بالمية. طلعت ممتازة كمان مش بس في تغطيه. المشكلة إنو كل ما أعمل داونلود الانترنت بيفصل! بعد فترة كتييير قصيرة
قلت يمكن المشكلة بالماك أجرب على كمبيوتر عادي، نفس القصة
قلت يمكن المشكلة من قطعة الـشبك شلت الشريحة وجربت قطعة تانية… برضو ما في فايدة
، أربع شحطات كاملة واشارة الاتصال من زين كامله

المشكلة انو الملفات اللي عم بحملها، ما فيها توقيف أو إكمال. لازم إعادة تحميل، فاضررت اني أشتري ٥ جيجا اضافية غير اللي عندي وادفع حقهم وانا اذا بتشوفو سجل الاستخدام عند زين بتلاقوني منزل نفس الملفات مرة، مرتين ،تلاته. هاي مش سرقة؟ ليش لما كان عندي سعة تحميل ما كان يفصل الاشتراك؟ لازم الواحد يتحمل ١٥ أو ٢٠ دينار زيادة عشان ما يفصل؟ انا بدفعي هدول المصاري كأني كبيت المصاري بالزبالة، وفلوس الناس مش حرام. عيب يا زين